|
مَرحبا کُر عَلیوُس / دَس وِ هفت تیرهَ
|
عیوُه که پیا سگوند / توُ جا بَمیرهَ
|
|
اَسبی بیرُت ها میا / کیهَ صحوُوش
|
اَسبکهَ کُرساکی / برُس رکاوُش
|
|
نَمَنهَ شنگ دوُ قطار / تی ر دِ تفنگمِ
|
قوُشنی دوُورمِ گریت / سی دلِ تنگمِ
|
|
هرَ بِراری مین جنگ/ پُشت بِرارهَ
|
شمشیرش وِ کار بایهَ / نوُمش دیارهَ
|
|
سگلاوُی کِرد وِ قوُشهَ/ هن کوُم بِرارهَ
|
تیر وُ تَشی زنسهَ / کُر تُجارهَ
|
|
دَس وُ بِرنوُ سنَهیردهَ / چنی قشنگهَ
|
سراسر موُلک آهوُ دشت/جنگوُ تفنگهَ
|
|
اَسب خِرسان دُم گریت/ شیپَش وِریسا
|
دَس تفنگ حاجی مِشهَ / مَنهَ دِ دُنیا
|
|
کحیلان نوُنم چشهَ / خوُنشکنهَ جوُ
|
دُشمنهَ کُر قلی / ها می کنهَ تووُ
|
|
شبیخوُن وا گرگ میش/ دُشمهَ وارتهَ
|
اَسبکهَ بَلی کُشس / مَنهَ نَرتهَ
|
|
رکاوُ سیش حالی کِردهَ/ صید میرزا رَسی
|
بَپر یا ترک اَسبمِ / دارمت بَلی
|
|
ایل سگوند ها دِ کمین/ دُشمهَ بَجیلیهَ
|
بِراروُ هوُشیار بایت / نیرنگ وُ حیلهَ
|
|
سَخت یسان ایلسگوند/دِ جنگ عروُوسوُ
|
پیروُزی سی خوانین / رَت تا لُرسوُ
|
|
حضوُر داشت اوُ غُلام خوُ / دِ کُل جنگیا
|
گوش و حرف آمادهَ باش/کُل اوُسگونیا
|
|
فصل وقت مِلاک نیی/جنگ سی خوانین
|
اِ خدا بعد غُلام / کی با جا نشین
|
|
هَرموُشی بُن مُعلا / سی کُل سگوند
|
قلی وا عین الونیا / فهَلوُن وُ دالوند
|
|
بُز کَشی رسم بی کُهن / دِ دوُو یتا موُ
|
غوُ ماچ یا نشوُ مینیان/ پیا گَپیا موُ
|
|
آروُم بی ایل سگوند / مُدت صبای
|
تا که وقتی جنگ می افتا/گروُ طنخوای
|
|
ندینمِ اوُ پیایا / اوُ روزگاروُ
|
تفنگ وُ اَسب وُ شمشیر/بیان اوُ سوُاروُ
|
|
بَنالمِ سی روُزگار / نارهَ بقایی
|
رَم نَکرد شاه سلیموُ / نهَ وا گدایی
|
|
حناسهَ سرد می کشمِ / مهِ سی دیارمِ
|
کُجا رَت اوُ گرمی / دَس دَس بِرارمِ
|
